بعد غياب جيت للدار.. وكثرت علي الفجاوي
لقيت بومها فوق الابيار.. يغرد غريد المهاوي
ولقيت الذرا ومكبرالنار.. وعقاب كوم داير نزاوي
له زمان مانظر زوار.. ولا نجع داير زداوي
بناين البيوت الاكبار.. عزا كل من جاهم جلاوي
ابوادي شوامس وتجار.. ماهم اقصار الخطاوي
محاربين في جيش الانصار.. على خيل سبق مقاوي
واليوم وينهم غير تذكار.. يحكي عليهم الراوي
الدايم الله وهذا اللي صار.. ميمولها للفناوي
ماتقول في سنين الاشكار.. انزلو وادي بو حناوي
واشربو على بو العيزار.. والخير والمال داوي
وكل ذود له هله حضار.. وبعد امداعكه بات راوي
لها وصف من قو الاقدار.. اقصور بانيهن اسطاوي
كيف الثلب كيف الابكار.. اتقول حادرة من علاوي
ومعاه عواويل جسار.. بها ياخذو في الخلاوي
لابسين للدقر الاقصار.. اللي يختشو من الدواوي
الواحد يذاري ع العار .. حاسب حساب الهزاوي
وعاقب ليل ملفات خطار.. عقاب ليل عوج اللغاوي
حاشت وهدر الهدار.. اللي منقلي نين طاوي
ازرق وعنده اتسوبار.. مكمل جميع الشهاوي
يلم الام ويلم الحوار.. ويلم المطرفه بالتساوي
العب حشوها ودار دوار.. وجن غلاظها ري دحاوي
وفي الصبح جنها بلا مار.. حلاباته بالشكاوي
فاس خير بالخير بشار.. لا شكمتها لا دعاوي
مايسد غير الغرار.. اللي من اوكال العفاوي
وين ماجفاهم الموكار.. بها فوق رقيو سماوي
نو وطن مرشوم بامطار.. عليه رايده جاي يواوي
فيه القطا وريم الاوعار.. وغريمات طير النداوي
ونا وين لجيت الانظار ما قابلو في جلاوي
وياما مشن بي الافكار وعاودت والعقل شاوي
ودمعي على الخد قطار كما دمع قزون فاوي
